Psa 90 | KYG | STEP | Ala kava nene, hu'na, lagaemo afole aige afole aige huta ne'maunagekae'mo kagaemo muki afina'mo notigana huka mai'nane.

Psalms 90

Mosese'a nunumu'mo hu'niya gemae

1 Ala kava nene, hu'na, lagaemo afole aige afole aige huta ne'maunagekae'mo kagaemo muki afina'mo notigana huka mai'nane. 2 Akeya'vilaga ave'e ma mopa'e'mo alo osu'nana afina'mo hogoteka mai'nananageka maige maige huka alagi maigane.

3 Kagaemo vaya'aife'mo, halate mopamo alita hamaleyo, huka huteka nefaligekae'mo mopamo alika hamaleka ne'apatane. 4 Vani tauseni'a kafugamo magoke afinakana huno hane'niye, huka kagesamo afi'nane. Egamo malage huno hano hu'niya kava huno vani tauseni'a kafugamo malage huno hano nehiye. Magoke hani'ilagamo malage huno hano hu'niya kava huno kaulagale'mo vani tauseni'a kafugamo malage huno hano nehiye. 5 Ani'mo heteno alinino ne'viya kava huka lavalelika uka nelatanageta nefalune. Alagamunamo age'nageno malage huno apake nekaniya kava huta malage huta nefalune. Kahaumo'mo netepi'mo lagiteno ause heteno'ae'mo une'amo ago falu neteya kava huta mai'neta nefalune. 7 Kaipamo leka latetekae'mo nelamagine. Kayamukiki nehanagetae'mo atete nehune. 8 Hosu kavatimo afole yate'mo hane'nigeka ne'agane. Huta fala kita ne'atalona hosu kavatimo kaulagaleke'mo hane'nigeka alika ne'malane. 9 Kaipamo le'nigeka ge nehukae'mo ma mopafi'mo maisuna afinatimo alika hogo huka nelatane. Kaitene'mo hu'a hapa nepaigeno'ae'mo malage huno apake nekaniya kava huta malage huta nefalune. 10 Lagaemo 70'a kafugamo maige lokiya vaya'mo 80'a kafugamo maige huta ne'mauna'monanafa lokiya ali'ya'mo alige hanageke ya'mo alige huta aise afina'mo mai'neta ma mopamo malage huta ataleta halelita ne'une. 11 Ina la'mo kaipamo le'niya lokiyakamo ageno alagepa huno age'niye. Kaipamo nelegeka kayamukiki nehanage'apae'mo lusi kava hu'a koli nehaya kavakamo ina la'mo ageno alagepa huno age'niye.

12 Ma mopafi'mo maisuna afinatimo lekana paisunafe'mo alika laya malegeta alagepa huta ageteta afino. 13 Ala kava nene, hu'na, aika atagi neka lagaetegamo eno. Na magi afina'mo kaipamo leka lategane. Ali'yakamo ne'aluna vayakae'mo kahau huka lato. 14 Muki afina'mo lamogaga aige amuse huge huta maisunafe'mo muki afina'mo nete'ae nete'ae'mo olataleka kahau huka lato. 15 Hanageke ya'mo lami'nanageno laipamo'mo kana hu'niye. Laha maegeta na magi afina'mo laipamo'mo kana hu'nifi huta ani agufa yatala afinake'mo lamogaga aino. 16 Ali'yakamo alika ali'yakamo ne'aluna vayakamo lave liyo. Laginago mafa'netimo himamukamo alika apave liyo. 17 Ala kava ne'mo Gotitimogae, hu'na, amuse huka lateteka laha maegeno'ao ali'yatimo'mo alagepa huno afole aino.